पर्साका प्रमुख जिल्ला अधिकारीबाट जारी आदेश आदेश जारी मिति : २०७८-०३-३१
पर्साका प्रमुख जिल्ला अधिकारीबाट जारी आदेश
आदेश जारी मिति : २०७८-०३-३१
विश्वब्यापी महामारीको रुप लिईरहेको नयाँ भेरियन्ट सहितको कोभिड-१९ संक्रमणको प्रभावकारी नियन्त्रण र रोकथामका लागि नेपाल सरकार मन्त्रिपरिषद्का निर्णयहरु, कोभिड-१९ संकट व्यवस्थापन अध्यादेशको दफा, ४ र स्थानीय प्रशासन ऐन, २०२८ को दफा ६(३) ले दिएको अधिकार प्रयोग गरी पर्सा जिल्ला भर अर्को आदेश नभए सम्मको लागि देहाय बमोजिमको आदेश लाई निरन्तरता दिइएको छ । यो आदेशको पालना गर्नु/गराउनु सम्बद्ध सबैको कर्तब्य हुनेछ । कोही कसैले यो आदेशको बर्खिलाप हुने गरी काम कारवाही गरेको पाईएमा प्रचलित कानून बमोजिम कारवाही हुने व्यहोरा समेत सबैलाई जानकारी गराईन्छ ।
देहाय
सञ्चालन गर्न रोक लगाइएका कार्य/क्रियाकलापहरु
- सबै प्रकारका सभा, सम्मेलन, जुलुस, जात्रा, सिनेमा हल, पार्टी प्यालेस, स्वीमिङपुल, मनोरञ्जनस्थल, सैलुन, ब्यूटी पार्लर, जिमखाना, रंगशालामा हुने दर्शक सहितको खेलकुद र मानिसहरु भेला जम्मा एवं भिडभाड भई गरिने अन्य कार्यक्रम गर्न/गराउन ।
- शैक्षिक संस्थाहरु (विद्यालय, कलेज, ट्यूसन सेन्टर) ले भौतिक उपस्थितिमा पठन पाठनको कार्य गर्न/गराउन ।
- नित्य दैनिक पूजाआजा बाहेक मानिस जम्मा भेला भई धार्मिक स्थलहरुमा धार्मिक एवं साँस्कृतिक क्रियाकलापहरु गर्न ।
- बीरगंज (ईनर्वा) नाका बाहेकका भारतबाट जिल्ला प्रवेश गर्ने अन्य नाकाबाट सीमा वारपार आवागमनमा गर्न ।
सञ्चालन गर्न सकिने कार्य/क्रियाकलापहरु
- घर बाहिर निस्कदा एवं सार्वजनिक स्थलमा जाँदा अनिवार्य रुपमा मास्कको प्रयोग गर्ने र व्यक्ति-व्यक्तिका बीच कम्तीमा २ (दुई) मिटरको दुरी कायम गर्ने । भिडभाडजन्य कार्य नगर्ने ।
- स्वास्थ्य सुरक्षाका मापदण्ड अनिवार्य पालना गरी गराई भिड भाड नहुने गरी सरकारी, सार्वजनिक, निजी कार्यालय/निकायहरुले सबै प्रकारका सेवा प्रवाह र कार्य सञ्चालन गर्ने/गराउने । सो को उपयुक्त व्यवस्था सम्बन्धित कार्यालय/निकायको प्रमुखले मिलाउने ।
- स्वास्थ्य सुरक्षाका मापदण्ड पालना गरी/गराई एवं स्वीकृत सिट सङ्ख्या भन्दा बढी यात्रु नराख्ने गरी सार्वजनिक तथा निजी सवारी साधन सञ्चालन गर्न पाईने । (लामो दुरीका सवारीको हकमा गनतब्य जिल्लाको जारी आदेशानुसार हुने)
- स्वास्थ्य सुरक्षाका मापदण्ड पालना गरी एवं २५ जना भन्दा बढी सहभागी नहुने गरी गोष्ठी, तालिम, सेमिनार, बैठक, प्रशिक्षण जस्ता कार्यहरु सञ्चालन गर्न सकिने ।
- स्वास्थ्य सुरक्षाका मापदण्डहरुको पूर्ण परिपालना गरी/गराई विभिन्न निकायबाट पूर्व निर्धारित सबै किसिमका लिखित तथा प्रयोगात्मक परिक्षाहरु सञ्चालन गर्न सकिने ।
- स्वास्थ्य सुरक्षाका मापदण्ड पालना गरी/गराई बजार एवं पसल खोल्ने । स्वास्थ्य सुरक्षाका मापदण्ड पालना नगरेको पाईएमा नियमानुसार कारवाही हुने ।
- विवाह, ब्रतबन्ध/नामाकरण संस्कार जस्ता कार्यको हकमा बढीमा २५ जना सम्मको उपस्थितिमा स्वास्थ्य सुरक्षाका मापदण्ड परिपालना गरी गर्न सकिने छ ।
- उद्योग, कलकारखाना सञ्चालन, सार्वजनिक विकास निर्माण, पेशा व्यवसाय सञ्चालन गर्दा स्वास्थ्य सुरक्षाका मापदण्डको अनिवार्य पालना गर्ने/गराउने ।
- यस जिल्लाको बीरगंज (ईनर्वा) सीमा नाकाबाट बिदेशी नागरिकको हकमा प्रवेश निषेध गरिएको र नेपाल प्रवेश गर्ने नेपाली नागरिकले तोकिएको स्वास्थ्य जाँच र प्रक्रिया पुर्याई स्थानीय तहले तोकेको आइसोलेसन सेन्टर वा होम आइसोलेशनमा अनिवार्य बस्नु पर्ने ।
- होटेल एवं रेष्टुरेन्ट स्वास्थ्य सुरक्षाका मापदण्डहरुको पूर्ण रुपमा परिपालना गरी आफ्नो कूल क्षमताको पचास प्रतिशत क्षमतामा मात्र सञ्चालन गर्ने ।
|
पिताम्बर घिमिरे प्रमुख जिल्ला अधिकारी
|